Kubanın yanacaq ehtiyatları tükənib: Nazirdən açıqlama

Kubanın yanacaq ehtiyatları tamamilə tükənib və bu da bütün ölkə üzrə uzun müddət davam edən elektrik kəsintilərinin əsas səbəblərindən birinə çevrilib.

Olkemedia.az -ın xəbərinə görə, bu barədə ölkənin energetika və dağ-mədən sənayesi naziri Visente de la O Levi “Mesa Redonda” telekanalının efirində çıxışı zamanı məlumat verib.

Onun sözlərinə görə, ölkədə mazut və dizel yanacağı yoxdur.

“Bizdə olan tək şey öz yataqlarımızdan çıxarılan səmt qazı və hasilatı getdikcə artan yerli neftdir”, – deyə nazir əlavə edib.

O qeyd edib ki, Kuba dekabr ayından bəri yanacaq tədarükü almayıb, yeganə böyük partiya isə yalnız dörd ay sonra Rusiyanın təxminən 100 000 ton neft ianəsi şəklində gəlib. Bu, kəsintilərin miqyasını müvəqqəti olaraq azaltmağa imkan verib, lakin ehtiyatlar may ayının əvvəlinə qədər tükənib.

Energetika naziri vurğulayıb ki, hökumət enerji keçidi strategiyası çərçivəsində öz neft və qaz istehsalının inkişafına, eləcə də günəş enerjisi istehsalının və enerji saxlama sistemlərinin genişləndirilməsinə üstünlük verir.